नवलपरासी,३ भदौ
एक बर्षमा यहाँका एक बन रक्षकले करिब एक सय सर्पको उद्धार गरेका छन् । डिभिजन बन कार्यालयमा कार्यरत शसस्त्र बनरक्षक पूर्ण बहादुर चौधरीले अजिगँर सहित विभिन्न प्रजातीका सर्प र अन्यबन्य जन्तुको उद्धार गरेका हुन् ।
उनका अनुसार उद्धार गरिएका सबै भन्दा बढि अजिगँर सर्प रहेका छन् । ५८ वटा अजिगँर सर्प,३९ वटा गोमन र एउटा दुईमुखे सर्प रहेका छन् । सरदर दिनको एउटा सर्प निस्केको खबर गाँउबाट आएकै हुन्छ, उनले भने, खबर आए पछि सर्प समाउन पुगिहाल्छु । पहिला सर्प सुन्दा नै डर लाग्ने तर अहिले सर्प पनि एउटा प्राणी जस्तै हो,भन्ने माया लाग्ने गर्छ । सुचना पाउने वित्तिकै सर्प समाउन दुगुर्ने गरेको उनले बताए । सर्प देखियो र बेलामा गइएन भने स्थानियले मारि नै हाल्छन कि जस्तो लाग्छ,उनले थपे,त्यो भएर अतिकति पनि ढिलाई नगरि सर्प समाउन पुग्छु । शुरु शुरुमा सर्प समाउदा भय लाग्थ्यो,उनले भने, एक पटक अजिगँरले पुरै जिउ नै बेरि सकेको थियो,तर जसो तसो छुटाए । अहिले अनुभव बढदै गएको छ । रिसाउने अवस्था पनि सर्पको थाहा हुन्छ । त्यो बेला सावधानी अपनाउनु पर्छ ।
वर्दिया निकुन्जमा सर्प समाउने तालिम डेढ दशक पहिला नै लिइएको उनले बताए । हजारौ सर्प समातेर उद्धार गरिएको उनले दाबी गर्दै भने, अजिगँर सर्पलाई जंगलमा छाडिदिन्छु,तर गोमनलाई डाडा कटाएर छाड्ने गर्छु । अजिगँरलाई जंगली आहार प्राप्त होस भनेर अनुमान गरेरै ति स्थानमा छाडिने गरिएको उनको भनाई थियो । गोमन सर्प विषालु भएका कारण प्राय मान्छेको आवागमन कम हुने स्थानको छनौट गरि छाडिदिइने गरिएको छ । सर्पसँगै अहिले खोलानालामा भेटिएका ६ वटा गोही समेत समातोर नारायणी नदीमा छाडिएको उनले सुनाए । त्यसै गरि दुई मुखे सर्प प्राय नेपालमा कम भेटिने हुदा ति सर्पलाई चितवन निकुन्जमा पठाइदिएको बताए । एक बर्षमा एउटा मुख खुल्ने र आर्को बर्ष आर्को मुख खुल्ने हुदा दुई मुखे सर्प भनिएको हो । दुबै मुखबाट आहार गर्ने गर्छ होला,उनले थपे,संसारमा प्रकृतिले थरि थरिकै प्राणीको उत्पति गरिदिएको छ ।
पृथ्वीमा सबै प्राणीको उत्तिकै महत्व भएको हुदा आम नागरिकलाई उनले सर्पलाई नमार्न आग्रह गर्ने गरेको बताए । सर्प मान्छे जस्तै रिस्वी साधेर टोक्दैन । मान्छेबाट जब उ भयभित हुन्छ,तब मात्र आफ्नो बचाउमा टोक्ने गर्छ । अजिगँर त झन भोकाएको बेला आहारा खोजी गर्दै बाहिर निस्कने प्रयास गर्छ । अघाएको बेला केही गर्दैन् । यो बर्ष सर्र्प र गोहीसँगै १ चितुवा,४ निलगाई,४ चित्तलको समेत समातेर उद्धार गरिएको सुनाएका थिए ।
