नवलपरासी,२२ असोज
जिल्लामा चोरी तस्करी बढदै गए पछि अहिले गाँउ गाँउमा जेन जि समुहका युवाहरु चोरी तस्करी नियन्त्रणमा लागेका छन् । पटक पटक चेतावनी दिदा पनि तस्करी गर्नेहरु नमाने पछि बुधवार रामग्राम १ सण्डाका जेनजी युवाहरु समुहले कुखुरा नियन्त्रणमा लिई प्रहरीलाई बुझाएका हुन् ।
सिमावर्ती भारतिय बजारबाट चोरी तस्करी गरि ल्याउदै गरेको अवस्थामा रामग्राम १ सहुवाटिकर र सण्डा गाँउको विचमा कुखुरा तस्करहरुलाई नियन्त्रणमा लिएका थिए । मोटरसाईकलमा लोड गरि सिमावर्ति भारतिय बजारबाट खुलेयाम कुखुराको चोरी पैठारी भई रहेको छ,तर प्रहरी मुक दर्शक भएर हेर्ने हुदा प्रहरीको समेत संलग्नता हुने आरोप स्थानियले लगाउदै आएका छन् । तिन वटा मोटरसाईकलमा सदरमुकाम परासीको सहुवाटिकर गाँउ हुदै कुखुरा लिएर जादै गरेको अवस्थामा स्थानिय युवाहरुले रोक्न खोजे पछि मोटरसाईकलमा राखिएका केही कुखुरा फालेर र केही लिएरै भागेको स्थानिय युवाहरुले जानकारी गराए । फालिएका कुखुराहरु प्रहरी बोलाएर जिम्मा लगाइएको उनीहरुले बताए ।
परासी बजार देखी सिमा १० किलोमिटर दक्षिणमा छ । सिमा क्षेत्रमा बर्डर अब्जरवेसन फोर्स(विओपी),बेलासपुरमा शसस्त्र प्रहरी बलको जिल्ला कार्यालय,सदरमुकाम परासीको बेस क्याम्प र विचमा नेपाल प्रहरीका चौकी र विटहरु रहेका छन् । ति सबै क्षेत्रलाई छल्दै आएका कुखुरा तस्करहरुलाई स्थानिय युवाहरुले नियन्त्रण लिन खोजे पछि उनीहरु भागेका थिए । यसबारे आफुहरुले प्रहरीलाई समेत जानकारी गराइ सकिएको बताएका थिए ।
चाडपर्वको अवसरमा सिमाक्षेत्रमा चोरी तस्करी खुलेयाम भई रहेका छन् । मोटरसाईकलमा लोड गरि राजमार्गसम्म पुर्याउनमा प्रहरीले नै सघाउने गरेको आरोप युवा समुह र स्थानियको थियो । भारतिय कुखुराको तस्करीलाई प्राथमिकता दिदा नेपाली कुखुरापालक किसान विस्थापनमा पर्ने भनाई उनीहरुको थियो । भारतिय कुखुरा तस्करी नरोकिदा नेपालका दर्जनौ कुखुरापालक किसान पेशा नै छाडेर वैदेशिक रोजगारीको खोजीमा जान बाध्य भई रहेको सुनाएका थिए । प्रहरी देश र जनताको सुरक्षा भन्दा तस्करीसँग मिलोमतोमा अनाधिकृत कमाईमा मात्र काम गर्ने गरेको दुखेसो पोखेका थिए ।
प्रहरीका घुमुवाहरुले तस्कर र डियुटीमा रहने प्रहरीसँग तालमेल मिलाई दिईने गरेको एक स्थानियले बताए । तस्करहरु मोटरसाईकल लिएर हिडे पछि त्यसको संकेत घुमुवा प्रहरीले फोन मार्फत डियुटी प्रहरीलाई दिन्छन्,उनीहरुले फरक रुटमा गएर तस्कर हिड्ने बाटो खुल्ला गरिदिन्छन् । सहज रुपले तस्करहरु मालसमान पुर्वपश्चिम राजमार्गसम्म पुर्याउ छन् । यस्ता गतिविधिहरु प्रति अहिले गाँउ गाँउमा जेनजी समुहका युवाहरु नियन्त्रण गर्ने कार्यमा सक्रिय हुन थलेका छन् । कुखुरा तस्करी सनई,रगरगँज,पडरी,गेर्मी,रमपुरवा,गोपालपुर लगायतका नाकाबाट हुने गरेको छ । पडरी र रगरगँजबाट सनई हुदै रामग्रामको लक्ष्मिपुर गाउ पुगेर हकुई जाने र हकुई हुदै बन्जरिया भएर सुनवलको राजमार्ग क्षेत्रका बजारमा पुर्याउने गरेका छन् । गोपालपुर,महेशपुर नाकाबाट छिर्नेहरु बैरवा हुदै जोकवार बैरिहवा भएर परासीको इमलीटोल सहुवाटिकर सण्डा भएर बडेर पुर्याउने गरेका छन् ।
यसैगरि वार्डमा विकास निर्माणका कार्य नगर्ने र परासी बजारका फोहोर मात्रै संकलन गरेर डम्पिगँसाईट बनाउने रामग्राम १ सण्डा गाँउकै जेनजी युवा समुहले फोहोरको गाडी नियन्त्रणमा लिई सो वार्ड अध्यक्षको घरमा पुर्याएका थिए । वार्ड अध्यक्ष रुद्र प्रकाश उपाध्ययले पटक पटक निर्वाचित भए पनि आफ्ना वार्डमा विकास भन्दा फोहोर फाल्ने क्षेत्र बनाउन खोजेको आरोप उनीहरुको थियो ।
