नवलपरासी,७ कातिक
जिल्लाको संघिय संसदिय निर्वाचन क्षेत्र नं.२ अन्तरगतका ४ पािलकामा परेको १ अर्ब बढिको बजेट कार्यान्वयन बारे सो क्षेत्रका साँसद नरेन्द्र कुमार गुप्ता सम्बन्धित पालिकाका स्थानिय र सरोकारवालासँग छलफल कार्यक्रम अगाडी बढाएका छन् । सडक तथा शहरी पुर्वाधार क्षेत्रको विकासका लागि एकमुष्ट रुपमा पालिका पालिकामा विनियोजित १ अर्ब ७९ लाख बजेटलाई प्राथमिकता तोकेर कार्यान्वयन गर्ने उदेश्यले उनले सो छलफल कार्य अगाडी बढाएको जानकारी उनको सचिवालयले जनाएको हो ।
सचिवालका अनुसार रामग्राम नगरपालिकामा सहरी सडक स्तरोन्नति, मर्मत सुधार, सडक सुरक्षा तथा सघन सहरी विकास कार्यक्रम अन्तर्गत ३९ करोड रुपैयाँभन्दा बढी बजेट परेको छ । प्रतिनिधिसभा सदस्य गुप्ताको पहलमा सहरी पूर्वाधार विकासका लागि उक्त बजेट परेको सांसदका स्वकीय सचिव ज्ञानेश्वर साहनीले जानकारी दिएका दिएका थिए । साहनीका अनुसार रामग्राम नगरपालिकामा सहरी सडक स्तरोन्नति, मर्मत सुधार तथा सडक सुरक्षा कार्यक्रमका लागि १७ करोड ४३ लाख रुपैयाँ र सघन सहरी विकास कार्यक्रमअन्तर्गत सहरी पूर्वाधार विकासका लागि २१ करोड ७९ लाख रुपैयाँ बजेट परेको हो ।
यसै गरि सुनवल नगरपालिकाको वार्ड नं.१ देखी १३ सम्म सडक स्तरोन्नती,मर्मत सुधार तथा सडक सुरक्षा कार्यक्रमका लागि १७ करोड ४३ लाख रहेको छ । त्यसै गरि सघन सहरी विकास कार्यक्रम अन्तरगत २३ करोड १ लाख गरि कुल ४० करोड ४४ लाख परेको छ । सडक मर्मत सुधार तथा सडक सुरक्षा अन्तरगत कार्यक्रम अन्तरगत पाल्हीनन्दन गाउपालिकाको वार्ड नं.१ देखी ६ सम्म १० करोड ४६ लाख परेको छ । सरावल गाउपालिकाको वार्ड नं.१ देखी ३ सम्मका लागि पनि १० करोड ४६ लाख रहेको छ ।
यो बजेट सम्बन्धित मन्त्रालय अन्तरगतका कार्यालयका प्राविधिकहरुको समन्वयमा पालिका भित्रका योजनाहरुको छनौट,प्राथमिकिकरण गरि कार्यक्रम अगाडी बढाईने उनको भनाई थियो । उक्त बजेट कार्यान्वयनमा आए गाउपालिका र नगरपालिकाको सडक सञ्जाल सुधार, सहरी पूर्वाधार विस्तार र व्यवस्थित सहरी विकासमा सहयोग पुग्ने अपेक्षा गरिएको छ । यसले जिल्लाकै दुई नगरपालिका र सिमावर्ति गाउपालिकाहरु मुहार फेर्नमा सहयोगी हुनेछ, खानेपानी,सिचाई,कृषि पर्यटन मार्फत पनि थप बजेट ल्याउन साँसद गुप्ताले पहल गरिरहेका छन् ,उनले भने, अन्य मन्त्रालयबाट पनि थप बजेट आउने सक्ने सम्भावना पनि बढदै गएको छ ।
नगरपालिकामा बढ्दो सहरीकरणसँगै सडकको स्तरोन्नति, नियमित मर्मतसम्भार, सडक सुरक्षा र आधारभूत पूर्वाधार विकासको आवश्यकता बढ्दै गएको छ । यस्तो अवस्थामा सहरी सडक सुधार तथा सघन सहरी विकासका लागि बजेट पर्नुलाई महत्त्वपूर्ण उपलब्धिका रूपमा हेरिएको छ । सहरी सडक स्तरोन्नति, मर्मत सुधार तथा सडक सुरक्षा कार्यक्रमबाट नगर क्षेत्रका सडकलाई व्यवस्थित बनाउने, आवागमन सहज बनाउने र सडक प्रयोगकर्ताको सुरक्षामा सुधार ल्याउने अपेक्षा गर्न सकिन्छ । त्यस्तै, सघन सहरी विकास कार्यक्रमले योजनाबद्ध रूपमा सहरी पूर्वाधार विस्तार गर्न सहयोग पु¥याउन सक्छ ।
दुबै नगरपालिका ऐतिहासिक तथा पुरातात्त्विक महत्त्व बोकेको क्षेत्र समेत हो । रामग्राम स्तूप बौद्ध धर्मावलम्बीका लागि महत्त्वपूर्ण सम्पदा हो । सुनवलको बाबा बर्दगोरिया र प्राचिन उत्तरक नगर(तरगौली ताल क्षेत्र) पनि बौद्धकालिन इतिहासा बोकेको पुरातात्विक क्षेत्र छन् । त्यसैले नगरपालिकाको सहरी विकासलाई आधुनिक पूर्वाधार निर्माणमा मात्र सीमित नराखी ऐतिहासिक सम्पदाको संरक्षण, पर्यटन प्रवद्र्धन र वातावरणीय सन्तुलनसँग जोडेर अघि बढाउनुपर्ने आवश्यकता छ । सघन सहरी विकास कार्यक्रम कार्यान्वयन गर्दा सडक, नाला, वर्षाको पानी निकास, खानेपानी, सार्वजनिक क्षेत्र र बस्ती व्यवस्थापनजस्ता आवश्यकतालाई एकीकृत योजनामा समेट्न सकिनेछ । त्यसका लागि नगरपालिकाको विद्यमान अवस्था अध्ययन गरी प्राथमिकताका आधारमा आयोजना छनोट गर्नु महत्त्वपूर्ण हुनेछ ।
त्यसैगरी, रामग्राम स्तूपको पुरातात्त्विक महत्त्वलाई ध्यानमा राख्दै सम्पदा क्षेत्र आसपासका पूर्वाधार विकास गर्दा सम्बन्धित निकायका मापदण्ड पालना गर्नुपर्ने देखिन्छ। व्यवस्थित सडक सञ्जाल र आवश्यक सहरी सुविधाले स्थानीय बासिन्दाको दैनिक जीवन सहज बनाउनुका साथै पर्यटन तथा व्यापारिक गतिविधिमा समेत सकारात्मक प्रभाव पार्न सक्छ । बजेटको प्रभावकारी उपयोगका लागि सम्बन्धित निकायले आयोजना छनोट, विस्तृत प्राविधिक अध्ययन, लागत अनुमान र कार्यान्वयन कार्यतालिकालाई प्राथमिकता दिन आवश्यक छ ।
साथै, निर्माण कार्यको गुणस्तर, पारदर्शिता र समयमै सम्पन्न गर्ने विषयमा समेत ध्यान दिनुपर्ने देखिन्छ । सांसद गुप्ताको पहलमा बजेट परेको जानकारी सार्वजनिक भएसँगै अब उक्त रकमबाट कुन–कुन सडक तथा सहरी पूर्वाधार आयोजना सञ्चालन हुनेछन् भन्ने विषय महत्त्वपूर्ण बनेको छ । आयोजना र बजेटको विस्तृत विवरण सार्वजनिक गरी स्थानीय आवश्यकताका आधारमा कार्यान्वयन गर्न सके निर्वाचन क्षेत्रका सबै पालिकाको सहरी विकासमा उल्लेखनीय योगदान पुग्न सक्ने अपेक्षा गरिएको छ ।
