नवलपरासी,२६ साउन
जिल्लाका सरकारी कार्यालय र सात वटा स्थानिय तहले समिक्षा कार्यमा ढिलाई गर्दा जिल्ला सभा गर्न ढिलाई भएको जिल्ला समन्वय समिति(जिसस) ले जनाएको छ । आफ्ना कार्यालय स्तरबाट अघिल्लो आर्थिक बर्ष २०८१।०८२ को प्रगति समिक्षा गरेर नसकाउदा जिल्ला सभा गर्न नसकिएको जिससले जनाएको हो ।
जिससले जिल्ला भरिको कार्यप्रगति विवरण जिल्ला स्तरमा प्रस्तुत गरि जिल्ला स्तरिय समिक्षा गर्ने र तत्पश्चात जिल्ला सभा कार्य सम्पन्न गर्दै आएको थियो । तर अहिले साउन महिना सकिन लाग्दा पनि सरकारी कार्यालय र पालिकाले समिक्षा गर्नमा ढिलाई हुदा जिल्ला सभा पनि ढिलाई भएको जिसस प्रमुख भगौती प्रसाद यादवले बताए । पालिका र सरकारी कार्यालयको सबैको समिक्षा गरेर जिसस पठाए पछि जिल्ला स्तरिय समिक्षा कार्य हुन्थ्यो, उनले भने, यता सात वटा स्थानिय तह मध्ये एउटा सरावल गाउपालिकाले मात्र समिक्षा सकेको जानकारी गराएको छ ।
अन्य पालिका र कार्यालयलाई जिससले ताकेता गर्दै आएको छ, उनले भने, तर जिम्मेवारी पुर्वक सम्बन्धित कार्यालयले बेलामै समिक्षा सकाएर पठाई दिन पर्ने हो,तर पठाएका छैनन् । यसले जिल्लासभा गर्नमा ढिलाई भएका छन् । केही महत्वपुर्ण निर्णयहरु जिल्ला सभाबाट पनि गराउनु पर्ने आवश्यकता छ । जिल्ला स्तरिय समिक्षा र जिल्ला सभाको बैठकसँगै बस्ने गरेको छ । एउटा कार्यालयले ढिलाई गर्दा आर्को कार्यालयलाई समेत असर पर्ने कुरा सम्बन्धित पालिका र कार्यालयहरुले बुझ्नु पर्ने हो । यस प्रति गम्भिर भएर बेलामै समिक्षा गर्न समेत जिसस प्रमुख यादवले आग्रह गरेका हुन् ।
