नवलपरासी | थारू समुदायको मौलिक कला, संस्कृति, परम्परा तथा पहिचानको संरक्षण र प्रवर्द्धन गर्ने उद्देश्यले नवलपरासीको रामग्राम नगरपालिका–१८ मा १३औँ श्री मनकामना युवा क्लबको आयोजनामा थारू सांस्कृतिक कार्यक्रम तथा झम्टा नाच सम्पन्न भएको छ।
कार्यक्रममा थारू समुदायको मौलिक भेषभूषा, कला, संस्कृति र परम्परागत नृत्य प्रस्तुत गरिएको थियो। कार्यक्रममा सहभागी कलाकारहरूले आकर्षक थारू पहिरनमा सजिएर मौलिक सांस्कृतिक नृत्य तथा झम्टा नाच प्रस्तुत गरेका थिए। उनीहरूको प्रस्तुतिले कार्यक्रममा उपस्थित दर्शक तथा अतिथिहरूको ध्यान आकर्षित गरेको थियो।
कार्यक्रमका क्रममा थारू समुदायको सांस्कृतिक पहिचान झल्काउने विभिन्न प्रस्तुति राखिनुका साथै कलाकारहरूलाई सम्मानसमेत गरिएको थियो। कार्यक्रममा स्थानीय जनप्रतिनिधि, समाजसेवी, युवा, बुद्धिजीवी तथा सर्वसाधारणको सहभागिता रहेको थियो।
पछिल्लो समय आधुनिकता र नयाँ पुस्तामा परम्परागत संस्कृतिप्रतिको आकर्षण घट्दै गइरहेको अवस्थामा यस्ता कार्यक्रमले मौलिक संस्कृति जोगाउन महत्वपूर्ण भूमिका खेल्ने अपेक्षा गरिएको छ। विशेषगरी युवा पुस्तालाई आफ्नो भाषा, संस्कृति, भेषभूषा र परम्परासँग जोड्न यस्ता सांस्कृतिक गतिविधि आवश्यक देखिन्छ।
स्थानीय स्तरमा युवा क्लबहरूले संस्कृति संरक्षणका लागि गर्ने यस्ता प्रयासले समुदायमा आपसी सद्भाव, एकता र सांस्कृतिक चेतना अभिवृद्धि गर्न सहयोग पुग्ने विश्वास गरिएको छ।
१३औँ अवसरमा आयोजित कार्यक्रमले थारू समुदायको मौलिक सांस्कृतिक सम्पदाको संरक्षण, प्रवर्द्धन र पुस्तान्तरणमा सकारात्मक सन्देश दिएको छ।